Este ano a ruta elixida é o Camiño de Inverno, opción tomada polos peregrinos a Santiago cando as neves impedían atravesar Pedrafita, un camiño que non deixa indiferente. Cruza por excepcionais paraxes naturais e artísticas. Nos seus inicios o peregrino atopará a inigualable paraxe de Las Médulas, Patrimonio da Humanidade (1997). Non menos abraiante é a entrada en Galicia, seguindo o río Sil, deixando á dereita a serra da Enciña da Lastra, Lugar de Importancia Comunitaria (LIC) dende o 2000.
Chegados á Ribeira Sacra, Itinerario Cultural Europeo dende o 2004, o peregrino aventúrase polos Canóns do Sil cos seus impresionantes miradoiros.
Xa na mítica serra do Faro, é imposible non quedar abraiado perante unha panorámica que abrangue as catro provincias galegas. Dende o cumio, ao pé da ermida, parecerá que está máis preto de Santiago, tocando o mesmo teito do ceo.
A ruta non coincide con ningún camiño anterior, faremos unha etapa por mes aproximadamente, e como nas outras ocasións, facilitaremos a acreditación de peregrino para ir selando e acadar a compostela.
O autobús estará sempre dispoñible para os que queirades ou necesitedes abandonar o camiño polo cansanzo. Os prezos de cada etapa serán proporcionais ao custo do autobús, e irán diminuíndo ao achegarnos á nosa meta. Os que asistan a todas as etapas terán unha satisfacción adicional, a derradeira etapa do ano (curso) será gratuíta.
1º ETAPA: AS MÉDULAS- PUENTE DE DOMINGO FLOREZ
O domingo 23 de outubro ás 8 da mañá sairemos do Pazo da Opera. Ao chegar, dedicaremos a mañá a facer unha ruta visitando As Médulas (León), e despois comezaremos o camiño que nos levará ata a localidade de Puente de Domingo Florez, a 8 km.
INSCRICIÓNS E PREZOS:
- A inscrición remata o xoves 19 de outubro
- Os prezos son 17€ para socios
- 21 € para os non socios.
- As persoas que non son socios teñen ocasión de facerse, xa que resulta moito máis económica esta modalidade.
Contidos adicionais: mapa (pdf) | cartaz | cartaz con mapa